New Look..بلاش

بسم الله الرحمن الرحيم New Look فكرة! ماذا لو قمت بضرب شعري في الخلاط بعد إضافة معلقة كاري ومعلقتين كركم لأتحول إلى شقراء وأفاجيء أبو البنين؟ أو لو سقط برطمان مربي البلح على رأسي وأنا أنظف الثلاجة هل سيحمر شعري فجأة فأتغير للأحمر((أقصد للأفضل)) و لو قمت بتركيب عجلات في شبشبي العزيز لأطوف ببيتي بسرعة البايتناج هل سأتغير وأعجب أبنائي وأصبح(ماما كول جدا ) فكرة! لون برقع الستائر رائع...لماذا لا أحوله إلى فستان بكرانيش وأهو أوفر على أبو البنين برده الحقيقة أنني لن أتغير وسأبقى كما أنا...أم البنين (ملحها قليل في الأكل..وحرقت براريد شاي كتير لحد ما أبو البنين يأس واشترى لها براد بيصفر ...بس على مين...البراد إتهرى تصفير لحد ما كان حا يتحرق هو كمان...وأخيرا لجأنا للغلاية علشان تفصل لوحدها...بس آخر واحده_إحم...بعد اللي اتحرقواقبلها_..ما بتفصلش إلا لما أروح أطفيها....بس ما تقولوش لحد.. هو أنا كده منحوسة؟ ) شيء جديد ونظرة جديدة وتغيير لكنه تغيير ظاهري فقط لماذا إذن النيو لوك ولماذا يلجأ إليه الآخرون؟ لماذا يكهرب الشباب رؤوسهم فتتخشب خصلات الشعر لماذا تقوم سوسو بإرتداء ملابسها الداخلية فوق البادي الكارينا وتظهر بنيو لوك إسلامي للحجاب ولماذا وقفت حسنية فجأة قبل أن تخرج من باب البيت و قالت (لازم أبين رقبتي علشان صاحباتي يشوفوا العقد الجديد) فألقت نصف الحجاب ثم عقد القطعة المتبقية على جانب رأسها ليكون نيوك لوك اسبانيش ولماذا تقوم فيفي بسرقة قميص شقيقها حمادة لتقص أزراره وتطرز بها حجابها القديم لتدندشه وترقعه... بل... لماذا سقط سهوا بنطال الشباب وهل للجاذبية الأرضية دور في سقوطه بتلك الطريقة الدرامية أحيانا أسير وأنا أخشى أن يسقط فعلا أحد البناطيل على الأرض وأكاد أصرخ في الشباب وأنا أركض لألحقهم (حاسب يا بني البنطلون حا يقع الله يسترك) بس بأتكسف رغم إنهم زي ولادي ومش عارفه إيه حكاية الجلدة اللي بيلبسوها في إيديهم!! (هو الرجاله بيلبسوا غوايش كمان!!) هل تغيير المظهر يريح النفس؟ وهل نفكر في الآخرين وفي تقييمهم لنا بعد رؤيتنا بهذا المنظر خايفة يطلع حجاب فرعوني وصيني وحجاب الهنود الحمر ولفة المهراجا أو البنات تلف شعرها سوست تحت الطرحة أو حد يخترع حجاب نابليون أو نقاب النينجا و طرحة الصعايدة وحجاب الشمس المشرقة وكله كوم والأورام الخبيثة اللي طالعة اليومين دول في الخليج (الظاهر بيحطوا علب الفول والأيس كريم الفاضية تحت الطرحة..قال إيه علشان يبان إن شعرها طويل وعاملاه كحكة) و الخدود و اللا الشفايف..مش عارفه يا جماعة إيه اللي حصل!! كل ما أتفرج على التليفزيون ألاقي الستات شفافيها أد كده...وخدودها طالعة لبره...وحواجبها متخشبه... وكأننا مش واخدين بالنا! حتى الملامح...عاوزين يعملولها نيو لوك كفايه حرام التغيير يبدأ من تغير الناظرين وتغير ما نحاول أن نراه في من أمامنا وليس مجرد تغيير صورة وما أروع البساطة....والشياكه المعتدلة...والألوان الهادئة...والحجاب الملائكي الصحيح..والبنطلون الناجح(يعني اللي مش ساقط) وكل واحد يثق في نفسه...واللي مش عاجبه ما يبصش مش كده واللا إيه؟ أختكم (من غير كاري ومن غير كركم) أم البنين