Sunday, October 25, 2009

خواطر بالريموت كنترول



السلام عليكــم ورحمـة الله وبركاتــة ،،

خواطر بالريموت كنترول


هي القنوات كترت كده ليه
أنا اتحولت
تيك (بالريموت كنترول)
الشيخ خالد الجندي: الموسيقى حلال
تيك
شيخ تاني:الموسيقى حرام
تيك
النقاب ما لهوش أصل في الدين خااااااااااااااااالص
تيك
النقاب فرض... واللي يقول غير كده جاهل
تيك
الحجاب مش مذكور في القرآن
تيك
الفنانة يسرا (((فنانة عظيمة))).
وفي لقاء آخر لنفس الشخصية:((أنا بأشمئز من المنقبات))
تيك
قناة أطفال...تعالى يا بودي(عبد الرحمن ابني 3 سنين) نتفرج سوا


*************

مطرب هلامي استضافته مذيعه هلامية
في يده اليمنى سوار وفي يده اليسرى (أنسيال) يعني غويشه للي مش عارفه...ومعاها ساعة كبيره مدوره
وكمان سلسلة وبكل ثقة أخبرها أن أجره في التمثيل أكثر من 2 مليون وأنه يملك 3 سيارات
صحيح الذكور كثير...لكن الرجال أقل عددا

*******************
والله برافو على قناة الرسالة
شغاله زي القطر وماشيه في خط مستقيم وما لهاش دعوة بالتراشق الإعلامي وبتحقق هدفها وكلها مفيدة
والدعاة من كل البلاد العربية
وأجمل حاجه إنها وسطية
أهو كده الكلام
**************

مذيعه الظاهر حد قالها انها بتقدم برنامج ديني
بعد ما اتمكيجت واتدندشت
ولبست أصفر وأحمر وعقود وسلاسل
لفت طرحه بالمرّة
وأكتر حاجه بتؤكد عليها((الحجاب لازم يكون شيك...مش هروله وبهدله))
والمشكله أن معظم الستات اللي بتتابعها مركزه مع لبسها أكثر من موضوع الحلقه
ولو كلموها بيقولولها انت شيك جدا والطقم النهارده يجنن
حاجه فزيعة

******************
سيراميك..يعني حاجه بندوس عليها برجلينا
سيراميك...يعني في الأرض
سيراميك...يعني مربع أو مستطيل وممكن يكون ألوان
يعني مش مدور ولا مقلوظ ولا بيرقص
إيه علاقته بالستات!!
وليه المحروسه بتتدلع في الإعلانات
هم بيبيعوا إيه؟؟

*********
استضافه في قناته الفضائية وأخبره أنه يحبه في الله
وقرأ خبر عنه بابتسامة ساخرة
هل حقا يحبه في الله؟
وهل حقا هو من الدعاة!!
أظن أن أغلب الدعاة في صدورهم شيء ما ويحتاجون فعلا إلى
شهبندر الدعاة ليصلح بينهم
*********
كلامها رائع ومنظم وباللغة العربية
ويكتب على الشاشة أنها داعية وباحثة في الإسلام
تضع الماكياج بشكل واضح!!
هو الماكياج بقى حلال!!
وهل أفتاها أحد الشيوخ الأزهريين أن ظل العيون وأحمر الخدود...يجوز!!

***********
أخبرها في الحوار أنه يتعجب لأنها تذهب معه للعمرة لن أدوارها وملابسها العارية لا تتفق مع هذا
فأجابت بكل ثقة
وهذا كلامها
((أنا ممكن ألبس عريان في فيلم أو أتباس في فيلم بس مش ده زي الغيبة والنميمة!!))
وأكملت لتزكي نفسها وحالها وما بينها وبين الله

*********


قناة عجيبة وفكرها أعجب
فتحت فجأه في أول رمضان
واختفت فجأة بعد انتهائه لأنها((قناة ررررررمضان))
مع انها كلها رقص وطبل وتنطيط حتى البرامج...تخوف
والمفاجأة..صاحبها اشترى من أيام طائرة خاصه ب80 مليون دولار
(أو جنيه مش فاكره)
إلهي ما تتفتح تاني يا رب
قولوا آمين
***************

البرنامج بييجي وقت الغذاء
كل يوم تقريبا بأشغله واحنا بنآكل

معظم المكالمات من ستات...يا إما جوزها بيحب واحده تانيه واكتشفت خيانته
أو خلاص اتجوز وهي مقهورة
أو بتشتكي منه ومن أهله وأخته ومرات أخوه وتشكر في نفسها
ولو كانت الضكتورة سوووعاد(د.سعاد صالح الأزهرية) ممكن تكون مكالمات من رجال حلفوا بالطلاق أربع خمس مرات كده واللا حاجه ورجعوا في كلامهم
حاجه تسد النفس على الغذاء...مش كده
أهو برنامج والسلام
المهم ما حدش ياخد باله إني قللت الملح في الأكل

****************



قناة الفجر عليها مسابقة المزمار الذهبي لأحسن صوت
تقدم من مصر 10000 متسابق
عارفين يعني إيه عشرة آلاف.....

التصفيات طبقت على خمس مراحل وقبل الأخيرة أصبحوا 100
مستويات مشرفة ورائعة

أخيرا صفصفوهم ل 10
منهم ابن الشيخ محمد حسان الله يحفظه ويحميه
أحمد محمد حسان
حاجه تفرح والله
23 سنه تقريبا وطالب في كليه أصول الدين


دي الحاجة الوحيدة اللي طمنتني على مصر
هي دي مصر يا عبله
وربنا يهديكي يا عبله

من أمام التليفزيون

أم البنين