Friday, January 17, 2014

المربحية بالفندقوش o_O
أنا: أنا اشتريت المربحية بالفندقوش :)
انتم:إيه المرحرحية بالبردقوش دي يا أم البنين o_O
أنا:حاجه كده جميييييلة 
قوي جدا خالص خالص 
شكلها ملفلح  :)
وطعمها زي السراريش
 وريحتها تحفه زي المهابيخ :)
وعليها من فوق دحاليج
 وحلوة مع الشاي بلبن ^-^
انتم:الله !
أكيد حلوة...شكلك فرحان
 يا ترى بالشوكﻻته دي والﻻ الكريمة انت أكلتي كام حته
 يا أم البنين...طب عاوزين نآكل
 وندوق وكده
أنا:في ناس كتشير أكلتها  ^-^
ربنا يرزقكم بقى ويحنن عليكم 
يا عيني يا مساكين. -_-
انتم:يا ترى شكلها إيه 
وإيه السراريش دي
 ومين الدحاليج دول.
وروحوا وناموا واحلموا وافتحوا التليفزيون 
واتفرجوا على الإعﻻنات والأغاني والأفﻻم واسمعوا كام بيت شعر في وصفها وقصة قصيرة ورواية عن شعورك وانت بتاكلها.
في جزء منكم حا يتخيلها حلويات  والتاني حوادق والتالت حا يشوفها فطيرة والرابع برايم برايم.
وارفع سقف التوقعات لفوووق لحد ما رجليك تطير في الهوا
 واحلم أحﻻم وردية وخيالية
وإحلم معاية ببكرة جاي ولو ما جاش إحنا نجيبه بنفسنا :)
قوم إيه بقى لما تيجي تآكلها -ورغم إنها حلوة جدا وبما ﻻ يخالف شرع الله- تقول إيه ده  :(
انا كنت فاكرها أحلى من كده
 ويجيلك إحباط  
وممكن تدعي على أم البنين  :(
أهو ده اللي بيحصل مع 
(الحب والجواز)
إتهرينا في الأفﻻم والمسلسﻻت وأغاني أم كلثوم وعبد الحليم كﻻم في الحب وسيرة الحب وسنين الحب وعذاب الحب
وكل بنت قاعدة مستنية العريس الوسيم الشاطر (حسنين)
 ييجي بسﻻمته راكب حصان أبيض
 ويخطفها من أبوها وتعيش في قصر كبير وتلبس فستان واسع وتغيظ الملكة.
أو يكتب فيها شعرويتشعبط على المواسير 
ويطلع لها من البلكونة ويقع فتنكسر رقبته ويتجوزوا في المستشفى.
والشاب من دول فاكر إنه حا يتجوز سندريﻻ 
وحا يرجع الضهر يﻻقي الأقزام السبعة خلصوا شغل البيت(وغسلوا المواعين) وهي الأميرة النائمة وحا يصحيها بقبلة رقيقة 
وحا تقوم من النوم متسشورة وحاطة روج وﻻبسة جزمة .
وسقف التوقعات بيرتفع لفوق أكتر لما بتتكتب قصص الحب وكﻻم الحب مع صورة اتنين شكلهم حلو 
وهي ﻻبسه ومتأنتكه وهو حاطط جل في شعره و شايلها 
أو ماسك مناخيرها مسكة سينيمائية وهي حاضناه وماسكة ودانه .
وبيبص لها بحنان وبتبص له بدﻻل(مع اﻻعتذار ل دﻻل.)
وروحوا وناموا واحلموا وافتحوا التليفزيون واتفرجوا على الإعﻻنات والأغاني والأفﻻم واسمعوا كام بيت شعر في وصف الحب وقصة قصيرة ورواية عن شعورك وانت بتحب.
وتعالى اتجوز 
وتعالي إتجوزي
 الإنسان اللي إخترتيه وفرحانه بيه وطبعا اللي لسه عايش في الأحﻻم ومتوقع شيء خيالي وساب نفسه للمؤثرات المرئية وكﻻم الناس  
والرغي والفتي الكتير ونسي الواقع  حا يكون شعورة كده زي اللي  أكل المربحية بالفندقوش ولقاها مش حلوة وزي ما كان فاكر...
رغم إنها حلوة وزي العسل.
افهموها صح
الحب بين الزوجين ليس لها قالب واحد وﻻ نموذج متفرد كل زوجين لهما حالة خاصة من الإندماج والتفاهم والحب تختلف عن الآخرين 
والسعادة مذاقها مختلف من شخصية لأخرى فﻻ تطبق تجارب الآخرين على نفسك.
الحب مش محتاج أميرة وأمير و ملكة جمال وفارس الفرسان.
الحب يعني  تحبها بعد الجواز حتى وهي حامل ووشها مورم وخدودها منفخة.
يعني لو بقى أصلع وبكرش يفضل فارس أحﻻمك.
يعني مش محتاج يكتب شعر كفاية كفه اللي بتطبطب على ظهرك ما هي دي ترجمة كلمة بحبك.
يعني هي جميلة لأنك بتحبها حتى لو هي مش جميلة.
يعني كل لحظة تمر عليكم مع بعض بتعيشوا جوا بعض .
يعني انت مسجون في روحها حبس إنفرادي.
يعني أي بنت حلوة مش حا تلفت نظرك لأن قلبك شبعان بحبك لزوجتك.

بأقول لكم إيه 
هي إيه المربحية بالفندقوش دي يا بنات حدش يجيب لي مقاديرها  :)

#أم_البنين
#حنان_ﻻشين
#حقوق_الطبع_محفوظة_في_الفريزر
#المربحية_بالفندقوش

Dancing Syndrome

أعراض 
(متلازمة الرقص)
Dancing Syndrome

حركات إهتزازية عشوائية متكررة تعبر عن حالة الكائن الراقص يعبر بها عن مشاعرةالدفينة. -_-

قد تظهر فجأة عند سماع كلمات معينة
(فرح،خطوبة ،حنة،عرس ديموقراطي) 
وﻻ يمكن التحكم فيها. >_<

تصاحب حالة الإهتزاز التفافات حلزونية للكفوف مع الإشارة بالكفين للجهات الخارجية شرقا وغربا
 (وده شيء وطني لأنه بيتهم الجهات الخارجية بالتدخل في شئون مصر الداخلية).:)

يﻻحظ نظر الكائن الراقص للأسفل
 (على جنب واحد كده)
 وغالبا لمحاولة إتقان  الرقصة
 (كائن متواضع  عنده حياء وما بيقدرش يرفع عينه في الكاميرا)
.oo

يﻻحظ حدوث حركات آليه  للرقبة فتتحرك حركات تشبه الرقص الهندي يمينا ويسارا تعبيرا عن 
(الرفض الداخلي.)
 -_-

أحيانا يتم اللجوء لربط عظام الحوض بقماشة
(طرحة،كوفية،حزام)
لمزيد من الشعور بالأمان...وتثبيت الأركان. o_O

الأعراض تتبع فورا كتابة كلمة نعم في ورقة بيضاء أو تكرارها أمام المصاب.

قد تنتقل العدوى تلقائيا لكبار السن المحيطين ويبدأ بالتصفيق والتمايل بحرص خوفا على عمودة الفقري. 
(ينصح تركه لأن منعه يزيد سوء الحالة)

يﻻحظ سماع صوت رنان ^-^
(صيحة كدهون....لولولولولييي)
مع اهتزاز الحنجرة بمهارة وارتداد اللسان على الجانبين 
وتتقنها النساء بمهارة
 وقليل من الرجال.

بعض الأبحاث والتقارير الفاشلة :(
أشارت بأن هذا هو
(الإسﻻم الجميل)
 ونوجه عناية سيادتكم لخطورة هذه الأكاذيب./:

تم تسجيل صمت واضح لبعض المؤسسات  على هذا السلوك الفاضح(ونورونا بسكاتهم) →

وأما لعﻻج هذه الظاهرة
ننصح المشاهدين بالصبر  >_<
وترديد
 حسبنا الله ونعم الوكيل طوال اليوم.

أم البنين(حنان ﻻشين)

#حقوق_الطبع_محفوظة_في_الفريزر
#ممنوع_الضحك
#حنان_ﻻشين
#أم_البنين 

Saturday, January 11, 2014

الشاويش عطية


الشاويش عطية
على فكرة مش شاويش
وﻻ عطية وﻻ غفير ...إنها مزة
وما بينكدش على البنات إﻻ الكلمتين دول:
إلبسي ياختشي كده  وانت خارجة وحطي في وشك حاجة
 طول ما انت عامله كده ماحدش حايبصلك
 ومش حا تتجوزي وقصري الطرحة دي
ولو البنت فتحت بقها وقالت كلمة
يقولوا لها....خليكي قاعدة وخلى الحجاب ينفعك!
كل الشباب والرجالة ما بيحبوش المقفلة.. يا مقفلة
:(
والمشكلة إن في شباب بيسمع وبيعمم وخﻻص يبقى ملتزم ويقول لك أنا عاوز عروسة فاهمة
بلاش المقفلة قوي دي :(
ﻻ هي مش مقفلة انتوا اللي فاهمينها غلطo_O
مش معنى إنها بتخرج بالنقاب  قدام الشباب الغرب تبقى غفير.
مش مخبية جوز فراخ تحت العباية على فكرة ومافيش أرانب
مش معنى ان طرحتها طويلة ومش بتحط ماكياج وﻻبسه جوانتي تبقى شاويش.
مش معنى ان طرحتها عادية ولبسها بسيط  تبقى ما عندهاش أنوثة.
مش معنى إنها جدعة وبتعتمد على نفسها تبقى راجل.
مش معنى إنها واثقة في نفسها تبقى غفير.
لو شديت ودنها حا تسقف زي البنات المزز اللي ماشيين في الشارع
.:)
ولو خبطتها على مناخيرها حا تغني
 ولو كعبلتها حا تحط مونوكير
 ^-^
ولو شديتها من خدودها حا تحبك
ولو شافت الروج  حا تاكله.... ق...قصدي عارفه انه بيتحط على الشفايف
وعندها جيبة والله وفستان قصير
وبتسرح شعرها  كل سنة مرة الحمد لله بعد ما تستحمى في العيد الكبير
.:)
عارفه الفرق بين البارفان والجﻻنس
وعارفه إن البيروسول مش مزيل عرق
عارفه المودة...أو الموضة...^-^
بتحب اللون البينك 
(كل البنات بتحبه مش عارفه ليه)
بتحب القطط والدباديب 
(وبتشتري ماديليات وسﻻسل وعقود كتير)
بترسم ورد وهي بتذاكر(وخطها منيل)
بتقرأ شعر (هي مش فاهماه بس بتحاول)
إيديها أصغر من إيديك ورقيقة
 :)
زيها زي البنات الروشين ويمكن أحلى كمان،
بترقص مع البنات صاحباتها وبتسقف 
وتغني بس لما بيكونوا في البيت 
نفسها تعيش 
هي بس عارفة إن نظرة رضا من ربنا 
أحسن من مليون نظرة إعجاب من الشباب اللي في الشارع.
ساترة نفسها ومحافظة على الأمانة 
ويوم ما تكون زوجة حا ينزل القمر ويغسل المواعين..ق...قصدي حا ينور في البيت.
مش ﻻزم تلبس بنطلون وتعمل لنا إنبهار في الشارع
 مش ﻻزم تطلع نص شعرها من الطرحة 
وترسم عينيها زي كيلوباترا علشان تبقى بنوته
 مش ﻻزم تلبس إكسسوار كأن حنطور ماشي في الشارع علشان تلفت نظرك
هي ممكن تمشي وما تحسش بيها لأنها مستورة
  والله بنوتة
بﻻش تظلموها
 :(
إلبسوا يا بنات في البيت وهيصوا واعملوا اللي انتم عاوزينة
 واضربوا شعركم في الخﻻط وحطوا مونوكير
 والبسوا جيبة....وكلوا جيلي كوﻻ
قال مقفلين قال o_O

أنتن عسﻻت
^-^

حنان لاشين
حقوق_الطبع_محفوظة_في_الفريزر